(NI JEAN MALANUM)

HANDANG-HANDA na ang Athletics Stadium at Acquatics Center sa loob ng New Clark City (NCC) sa Capas, Tarlac para mag-host ng tatlong test events ng 30th Southeast Asian Games (SEAG).

Nakatakdang gawin mula Oktubre 26-27 ang athletics at diving kasunod ng waterpolo sa Oktubre 28.

May 183 atleta ang kalahok sa test events kung saan masusukat ang kakayahan nila at bilang paghahanda na rin sa Games proper na idaraos sa Nobyembre 30 hanggang Disyembre 11.

Nag-withdraw ang Cambodia, Myanmar at Laos, kaya’t 120 atleta na lang mula sa Pilipinas (49), Thailand (25), Malaysia (15), Singapore (12), Vietnam (9), Indonesia (6), Brunei (4) ang sasali sa athletics.

Sa diving, 11 atleta mula sa Pilipinas (8) at Malaysia (3) ang maglalaban-laban matapos na mag-back out ang Indonesia noong Oktubre 19.

Apat na teams mula sa Philippines, Indonesia, Taiwan (Chinese Taipei) at Shanghai (China) kasali sa waterpolo kung saan ang bawa’t koponan ay binubuo ng 13 atleta.

Nauna nang ginawa ang Asean Grand Prix na nagsilbing test event ng volleyball sa Los Banos, Laguna samantalang ang modern pentathlon ay ginawa noong Oktubre 9-10 sa Subic, Zambales.

Ang esports test event ay gagawin sa Flying V FilOil Arena sa San Juan, Metro Manila sa Nobyembre 4.

Ang 22 events sa athletics ay 100m, 200m, 400m, 800m, 1500m, 5000m, 10000m, 110m hurdles, 400m hurdles, 3000m steeple chase, 4x100m relay, 4x400m relay, high jump, long jump, triple jump, pole vault, shot put, discus throw, javelin throw at hammer throw sa men’s at women’s categories. Kasama rin ang 4x100m at 4x400m sa mixed categories.